Sat, 17 Nov 2018
19
Los Angeles

SAN FERNANDO CITY, Nob. 8 (PIA) - - Rinugian ti Regional Development Council (RDC) iti Rehion 1 babaen kadagiti kameng ti Investment Promotion Group (IPG) ti pannakaaramid ti "investments promotion plan" (IPP) a mangawis kadagiti investors nga umay agpasiar ken agpuonan ti negosio iti Ilokos.

Segun kenni Assistant Regional Director Donald James D. Gawe iti National Economic and Development Authority-Rehion 1 (NEDA-1), immuna nga inggannuat ti RDC 1 babaen ti pannakitinnulong ti Department of Trade and Industry-Rehion 1 (DTI-1) ti dua nga aldaw a session dagiti mangibagi ti 17 nga ahensia ken pribado a sektor a kameng ti IPG idi Oktubre 16-17.

Kabayatan ti dua nga aldaw a session a naaramid idiay Oasis Country Resort, San Fernando City, La Union, naipakita dagiti naduma-duma a produkto ken ti kinabaknang ti intero a Rehion 1 tapno adda pagibasaran dagiti nagatendar iti pannakaaramid ti umiso a plano a mangguyugoy kadagiti "investors" nga umay bumisita iti Ilokos.

Kinuna ni Gawe a dagiti kangrunaan a sektors a masapul a mairaman iti IPP ket ti agrikultura ken industria, ti turismo ken ti impraestraktura. Dagiti met produkto ken industria iti rehion a masapul a maitandudo ken mairaman iti IPP ket ti mangga, kakaw, kape, dagiti naproseso a prutas, bangus, ken kawayan.

Iti "workshop" nga ingannuat ni Senior Investment Specialist Luna Gracia Panesa-Ahmad iti Board of Investments (BOI), naputar ti sirmata ken mision ti IPG, ken dagiti plano ken estratehia a mangitandudo kadagiti lugar iti rehion a mabalin a pagpatakderan ti pasdek-negosio ken dadduma pay a pagsapulan, ken nangayed a pagpasiaran. Ingunamgunam pay ni Ahmad ti kinapateg ti "basic profiles" ti rehion para iti pannakaaramid ti IPP.

Segun kenni Ahmad, tallo a banag ti rumbeng a mainkonsidera iti panagaramid ti estratehia ti IPP. Karaman ditoy ti "image building," "investor servicing" ken "investments generation."

Kinuna pay ni Ahmad a dagiti local government units (LGUs) ti addaan ti kangrunaan a responsibilidad iti "investments promotions" gapu ta adda iti salinongda dagiti produkto ken dagiti lugar a mabalin a pagnegosioan dagiti "investors."

Kalpasan ti "workshop," kinuna ni Gawe a naurnong amin nga "outputs" dagiti nakipartisipar tapno mapagtitipon para iti pannakaaramid ti "IPG plan 2018-2024." Mausarto pay ti IPG Plan 2018-2024 para iti panang-"update" ti Regional Development Plan (RDP) iti Rehion 1. (FGL/PIA-1)

More Los Angeles News

Access More

Sign up for Los Angeles News

a daily newsletter full of things to discuss over drinks.and the great thing is that it's on the house!